Աղավնի Գրիգորյան, Մանկագրություն

Արևածագ

Ականջօղ

Գայանեն հագավ

Նոր շրջազգեստը

Ու շորորալով

Դիմեց հայելուն.

— Վա՜յ, էս ինչ անուշ,

Սիրուն աղջիկ է,

Ականջօղերն են

Միայն պակասում:

Առաջին սեր (Ա՜խ, Թամար)

Մանկապարտեզից տուն գալու ճամփին

Աշոտիկը լուռ, գլուխը կախ էր,

Ոչ առաջվա պես զվարթ երգում էր,

Ոչ էլ կոնֆետ էր պահանջում համեղ:

— Բալիկ ջան, հո քեզ բան չի՞ պատահել, —

Մայրը անհանգիստ նայեց աչքերին,

— Մամ, մինչև բակից բարձրացա վերև,

Վահանը նստեց Թամարի կողքին:

Արևածագ

(շուտասելուկ)

Արևն Արեգին

Բարև ասելիս

Իր շողիկներով

Խուտուտ է տալիս:

Արեգն Արևի

Բարևից ժպտուն

Արև է դառնում

Մայրիկի գրկում:

Անուլի տարեդարձը

Գոհարիկն այսօր շատ անհանգիստ է՝

Տիկնիկը դարձավ երկու տարեկան.

— Մամ, դեռ այնքա՜ն բան պիտի հասցնեմ,

Ուղիղ մի ժամից հյուրերը կգան:

Դու փուչիկները կփչե՞ս, մամ ջան,

Մինչև ես տորթի մոմերը շարեմ,

Խնձորով աղցանն արդեն պատրաստ է,

Մնում է նռով սիրուն զարդարեմ:

Հետո Անուլին արագ լողացնեմ,

Մազերին կապույտ ժապավեն կապեմ…

Ուղիղ մի ժամից հյուրերը կգան,

Մամ, դեռ այնքա՜ն բան պիտի հասցնեմ:

Ոչ մի կնճիռ

Սոֆին վարունգը

Կեղևից մաքրեց,

Շերտ առ շերտ շարեց

Տիկնիկի դեմքին։

-Բա ես կթողնե՞մ,

Որ ինչ-որ կնճիռ

Փորձի մոտիկ գալ

Իմ Անուշիկին:

Գյուտարար Արայիկը

Արայիկը ամբողջ մի օր

Տանջվեց. քանդեց հավաքեց։

Իր երկանիվ հեծանիվը

Միանիվի վերածեց:

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով